काठमाडौं- काठमाडौंको तीनकुनेमा भएको हिंसात्मक प्रदर्शनको मुख्य अभियुक्तका रूपमा देखिएका दुर्गा प्रसाईंमाथि पाँचवटा मुद्दा दर्ता गर्न प्रहरीले तयारी गरेको छ। प्रहरीले घटनाबारे ५६ दिन लामो अनुसन्धानपछि सरकारी वकिल कार्यालयमा प्रतिवेदन बुझाउने अन्तिम तयारी गरिरहेको छ।
नवराज सुवेदी नेतृत्वको ‘संयुक्त जनआन्दोलन समिति’का जनकमाण्डर प्रसाईंले सो दिन राजसंस्थाको पुनर्स्थापनालगायत माग राख्दै प्रदर्शनको आह्वान गरेका थिए। तर सभा सुरु हुनु अघि नै प्रदर्शन हिंसात्मक बनेको थियो। प्रहरीले प्रसाईंमाथि ज्यान मार्ने उद्योग, ज्यानसम्बन्धी कसुर, राजद्रोह, आपराधिक उपद्रव र संगठित अपराध अन्तर्गत मुद्दा चलाउन सिफारिस गर्ने भएको छ।
प्रसाईंले प्रदर्शनका क्रममा प्रहरीले रोक्न खोज्दा गाडी प्रहरीमाथि चलाएको आरोप छ। सोही क्रममा प्रदर्शनकारीले सरकारी गाडी, निजी भवन, पार्टी कार्यालय र जडिबुटी प्रशोधन केन्द्रमा आगजनी गरेका थिए। भाटभटेनी सुपरमार्केटमा लुटपाट गरिएको थियो भने दुई जनाको मृत्युसमेत भएको थियो।
प्रहरीका अनुसार एभिन्युज टिभीका पत्रकार सुरज रजकको तीनकुनेस्थित जलिरहेको घरमा मृत्यु भएको घटनालाई लिएर प्रसाईंविरुद्ध मुलुकी अपराध संहिता २०७४ को दफा १७७ अनुसार ज्यान मार्ने नियतको कसुरमा मुद्दा चलाउन सिफारिस गरिँदैछ।
त्यस्तै, ‘अनवरत तत्पर फौज’ (एटिएफ) का सदस्य सरोज गौतम र गोकर्ण शाहीविरुद्ध पनि आगजनी तथा ज्यानसम्बन्धी कसुरमा अभियोग दर्ता हुने भएको छ। दुवैजनाको भिडियो सार्वजनिक भइसकेको प्रहरीले जनाएको छ।
राज्यविरुद्धको अपराध अन्तर्गत प्रसाईंमाथि राजद्रोह (दफा ५०), आपराधिक उपद्रव (दफा २८५) र संगठित अपराध सम्बन्धी मुद्दा चलाउने तयारी पनि भइरहेको छ।
हाल प्रसाईं चैत २९ गतेदेखि काठमाडौं प्रहरी परिसरको हिरासतमा छन्। यता, घटनासँग जोडिएका राप्रपाका वरिष्ठ उपाध्यक्ष रवीन्द्र मिश्र, धवलशम्शेर राणा लगायत ३७ जना भने हाजिर जमानीमा रहेका छन्।
यस प्रकरणले सामाजिक अशान्ति, सञ्चारकर्मीको मृत्यु, सार्वजनिक सम्पत्तिमा क्षति र राजनीतिक आन्दोलनको चरम सीमाबारे बहस चर्काइरहेको छ। राज्यले अब कसरी कानुनी कारबाही अगाडि बढाउँछ भन्नेमा आम चासो बढेको छ।
