सिन्धुपाल्चोक । फागुन २१ गते सम्पन्न प्रतिनिधि सभा निर्वाचनमा पार्टीका आधिकारिक उम्मेदवारलाई हराउन भूमिका खेलेको आरोप लगाउँदै नेपाली कांग्रेसका पूर्वकेन्द्रीय सदस्य मोहनबहादुर बस्नेतसहित ११ जना नेताविरुद्ध कारबाहीको सिफारिस गरिएको छ।
नेपाली कांग्रेस सिन्धुपाल्चोकका जिल्ला सभापति तथा क्षेत्र नम्बर १ का उम्मेदवार जंगबहादुर लामाले सोमबार पार्टीको केन्द्रीय अनुशासन आयोगमा कारबाहीका लागि सिफारिस पठाएको जानकारी दिएका छन्।
कारबाही सिफारिसमा परेकामध्ये पूर्व केन्द्रीय सदस्य बस्नेतसँगै बाह्रबिसे नगरपालिकाका मेयर तथा क्षेत्रीय सभापति बालकृष्ण बस्नेत, बागमती प्रदेशसभा सदस्य मसिना खड्का भण्डारी र सुनकोशी गाउँपालिकाका पूर्व अध्यक्ष श्रवणकुमार जिसी रहेका छन्।
त्यस्तै, कांग्रेस नेताहरू रामकुमार थापा, निमा जाङ्बो शेर्पा, सुवास तिमिल्सिना, लालाकाजी तामाङ, जेठा लामा (जोगलाल) र रवि थिङलाई पनि कारबाहीका लागि सिफारिस गरिएको जिल्ला सभापति लामाले बताए।
जिल्ला कार्यसमितिले हाल क्षेत्र नम्बर १ मा निर्वाचनका क्रममा अन्तर्घात र असहयोग गर्नेहरूको नाम मात्र सिफारिस गरिएको जनाएको छ। केही दिनभित्रै क्षेत्र नम्बर २ का सम्बन्धमा पनि यस्तै सिफारिस गरिने कांग्रेसले जनाएको छ।
“निर्वाचनमा अन्तर्घात र असहयोग गर्नेहरूलाई केन्द्रीय अनुशासन आयोगमा कारबाहीका लागि सिफारिस गरेका छौँ, अब आवश्यक निर्णय केन्द्रले गर्नेछ,” जिल्ला सभापति लामाको भनाइ छ।
सिफारिस गरिएका कतिपय नेताहरूको गतिविधिबारे पार्टी केन्द्र पनि जानकार रहेको बताइएको छ।नेपाल प्रेसबाट साभार
