काठमाडौं – आज मे १ अर्थात् १३६औँ अन्तर्राष्ट्रिय श्रमिक दिवस, नेपालमा पनि विभिन्न कार्यक्रमसहित भव्य रूपमा मनाइएको छ। ‘श्रमिकका अधिकार र सामाजिक न्याय’ को नाराका साथ मनाइने यस दिवसमा श्रमिकहरूको योगदानलाई सम्मान गर्दै उनीहरूको हक, हित र मर्यादा सुनिश्चित गर्न विभिन्न श्रमिक संगठनहरू, राजनीतिक दलहरू तथा सरकारी निकायहरूले बृहत कार्यक्रम आयोजना गरेका छन्।
सन् १८८६ मा अमेरिकाको सिकागो शहरमा ‘आठ घण्टा काम, आठ घण्टा विश्राम र आठ घण्टा मनोरञ्जन’ को नारासहित भएको ऐतिहासिक श्रमिक आन्दोलनको स्मृतिमा विश्वभर यो दिवस मनाइँदै आएको हो। उक्त आन्दोलनको क्रममा हय मार्केटमा भएको बम विस्फोट र प्रहरीको गोलीले सात मजदुरले ज्यान गुमाए पनि अन्ततः मजदुर आन्दोलनले श्रम अधिकारमा ऐतिहासिक विजय हासिल गर्यो।
नेपालमा यस दिवसको औपचारिक सुरुवात २०१९ सालमा नेपाल मजदुर संगठनद्वारा पहिलो पटक कार्यक्रम आयोजना गरेर गरिएको हो। त्यसपश्चात २०४६ सालको राजनीतिक परिवर्तनपछि नेपाल सरकारले प्रत्येक वर्ष श्रमिक दिवसको अवसरमा सार्वजनिक बिदा दिन थालेको हो।
दिवसको अवसरमा राजधानी काठमाडौंसहित देशभर विभिन्न श्रमिक संघसंस्थाहरूले र्याली, अन्तरक्रिया, सांस्कृतिक कार्यक्रम तथा श्रमिकहितका विषयमा जनचेतनामूलक गतिविधिहरू सञ्चालन गरेका छन्। सरकारले पनि श्रमिक वर्गप्रतिको सम्मानस्वरूप आज सार्वजनिक बिदा दिएको छ।
सम्बन्धित खवर
