बलेफी ५को सार्वजनिक सुनुवाई सम्पन्न

बलेफी- बलेफी गाउँपालिका वडा नं. ५ ले आर्थिक वर्ष २०८०/०८१ को सार्वजनिक सुनुवाइ कार्यक्रम सम्पन्न गरेको छ । वडामा वर्षभरि सञ्चालन भएका योजना तथा कार्यक्रम र आय व्ययको सार्वजनिक सुनुवाइ गरेको हो । जनसेवा आ.वि . बाघखोरमा शुक्रबार आयोजित कार्यक्रममा आर्थिक वर्ष २०८०/०८१ मा सञ्चालन गरिएको योजनाहरू, प्रवाह गरिएको सेवाहरू तथा समसमायिक विषयमा सार्वजनिक सुनुवाई कार्यक्रम सम्पन्न गरेको हो ।

सेवाग्राहीवाट आएका प्रश्नहरुको जवाफ दिदै वडा अध्यक्ष यादव ठकुरीले वडाले  आर्थिक वर्ष २०८०/०८१मा  शिक्षा, स्वास्थ्य, वाटो, खानेपानी, कृषि, पशुपालन लगायतका विकासको लागी वजेटको व्यवस्था गरी सोही काममा खर्च गरी वडालाई समृद्ध वनाई गाउँपालिकाकै नमूना वडाको रुपमा स्थापित गर्ने बताए ।

जन आपेक्षा अनुरुप क्रमश विकास निर्माणको काम गर्दै  वडालाई हराभरा वनाई रोजगारीको अवसर सिर्जना गरी यूवालाई आफ्नै गाउँ—ठाउँमा जिविकोपार्जन गर्ने व्यवस्थापन मिलाउने कुराको उल्लेख गर्दै महिलाहरुको क्षमता अभिवृद्धिका लागी विभिन्न शिपमूलक तालिम दिने पनि बताए ।

सेवाग्राहीहरुले जनप्रतिनिधिहरुले चुनावको वेलामा जनतालाई गरेको प्रतिवद्धता नभुल्न आग्रह गर्दै वडाको संरचना, वाटो पिउनेपानी, सिचाई, कृषि, पशुपालन, शिप मुलक तालिम, रोजगार र वादरको आतंक जस्ता कुराहरु वोलेका थिए ।