नेपाल आइडलकी फाइनलिस्ट गंगा सोनामलाई इन्द्रावती गाउँपालिकाद्वारा १ लाखसहित सम्मान गरिने

सिन्धुपाल्चोक: नेपालको लोकप्रिय गायन प्रतियोगिता ‘नेपाल आइडल’ सिजन ६ को फाइनलमा पुग्न सफल गंगा सोनामलाई इन्द्रावती गाउँपालिकाले नगद १ लाख रुपैयाँसहित सम्मान गर्ने निर्णय गरेको छ। गाउँपालिकामा बसेको कार्यपालिका बैठकले वडा नम्बर १० निवासी सोनामले राष्ट्रियस्तरको रियालिटी शोमा पुर्‍याएको योगदानको कदर गर्दै उक्त रकम प्रदान गर्ने निर्णय गरेको हो।

गाउँपालिका अध्यक्ष झकनाथ नेपालका अनुसार, गंगा सोनामले सिन्धुपाल्चोक जिल्लालाई मात्रै नभई सम्पूर्ण देशलाई गौरवान्वित बनाएकी छिन्। सयौँ प्रतिस्पर्धीलाई पछि पार्दै फाइनल सम्मको यात्रा तय गरेकी सोनामलाई सम्मान गरेर गाउँपालिकाले कला र प्रतिभालाई प्रोत्साहन दिन खोजेको अध्यक्ष नेपालले बताउनुभयो।

हाल नेपाल आइडल सिजन ६ को उपाधिका लागि प्रतिस्पर्धा गरिरहेकी सोनामको नतिजा भोटका आधारमा घोषणा हुनेछ। त्यसैले उनलाई जिताउनका लागि गाउँपालिकाले सम्पूर्ण वडावासी र शुभचिन्तकहरूलाई सम्भव भएसम्म भोट गरेर सहयोग गरिदिन समेत आह्वान गरेको छ।

गाउँपालिकाको यस निर्णयले गंगा सोनामको मेहनत र प्रतिभाको उच्च कदर भएको छ। साथै, यसले अन्य युवा प्रतिभाहरूलाई पनि कला र गायन क्षेत्रमा अगाडि बढ्न थप प्रेरणा मिल्ने अपेक्षा गरिएको छ।