काठमाडौँ, चैत १२ – प्रतिनिधि सभाका नवनिर्वाचित २७४ सांसदले बिहीबार पद तथा गोपनीयताको शपथ लिने भएका छन्। ज्येष्ठ सदस्य अर्जुननरसिंह केसी ले सिंहदरबारस्थित सङ्घीय संसद् भवनको बहुउद्देश्यीय सभाकक्षमा दिउँसो २ बजे शपथ गराउने कार्यक्रम तय भएको छ।
यसअघि केसीले बुधबार राष्ट्रपति रामचन्द्र पौडेल बाट शपथ ग्रहण गरेका थिए। सङ्घीय संसद् सचिवालयका प्रवक्ता एकराम गिरी का अनुसार शपथका लागि सम्पूर्ण तयारी पूरा भइसकेको छ र सांसदहरूलाई कार्यक्रमभन्दा दुई घण्टा अघि उपस्थित हुन आग्रह गरिएको छ।
कानुनी व्यवस्थाअनुसार सांसदले सदन वा समितिको बैठकमा भाग लिनुअघि शपथ लिन अनिवार्य हुन्छ। यसका लागि निर्वाचित सदस्यले नागरिकता, फोटो र प्रमाणपत्रको प्रतिलिपि बुझाउनुपर्ने व्यवस्था गरिएको छ।
विशेषतः, ५४ जना सांसदले मातृभाषामा शपथ लिने जानकारी दिएका छन्। नेपालीबाहेक मैथिली, भोजपुरी, नेपाल भाषा, बज्जिका, रानाथारू र थारू भाषामा शपथ लिने तयारी भएको छ। यो संख्या अझै बढ्न सक्ने सचिवालयले जनाएको छ।
शपथग्रहणसँगै नव निर्वाचित सांसदहरूको औपचारिक कार्यकाल सुरु हुनेछ।
सम्बन्धित खवर
