प्रधानमन्त्री सुशीला कार्कीले सहकारी ठगीमा संलग्नहरूलाई कारबाही गर्न निर्देशन दिएकी छन्।
बिहीबार प्रधानमन्त्री तथा मन्त्रिपरिषद् कार्यालयमा सहकारी मन्त्री अनिल सिन्हा, सहकारी मन्त्रालयका सचिव केदारनाथ शर्मा, प्रधानमन्त्री कार्यालयका सचिव राजकुमार श्रेष्ठ, संकटग्रस्त समस्या समाधान समितिका अध्यक्ष, सहकारी नियमन प्राधिकरणका पदाधिकारी, सहकारी पीडित बचतकर्ता संरक्षण राष्ट्रिय महासंघका पदाधिकारीलाई एकै ठाउँमा राखेर प्रधानमन्त्री कार्कीले सिंहदरबारमा छलफल गरेकी हुन्।
सो क्रममा उनले सहकारी ठगी गरेर हिँड्नेहरूलाई कुनै हालतमा छाड्न नहुने बताइन्।
‘ठगेर खाएर हिँड्नेहरूलाई कुनै हालतमा छाड्न हुँदैन। यिनीहरू सुनका घडी लगाएर हिँड्छन्। महँगा गाडी चढेर हिँड्छन्। नक्कली डिभोर्स गराएर हिँड्छन्। उनीहरूलाई छाड्न मिल्दैन। बरू कानूनमा समस्या छ भने त्यो पनि संशोधन गरौं,’ उनले भनिन्, ‘जे गर्नुपर्छ गरौं तर ठगेर हिँड्नेलाई नछाडौं, पीडितलाई रूँदै हिँड्नुपर्ने अवस्था अन्त्य गरौं।’
अन्तरिम सरकारको चुनाव गराउने दायित्वसँगै भ्रष्टाचार नियन्त्रण र सहकारी समस्या समाधान गर्नु पनि रहेको बताइन्।
