काठमाडौं- नेपालकी तेक्वान्दोकी अन्तर्राष्ट्रिय निर्णायक तथा १३औं दक्षिण एसियाली खेलकुद (साग) की स्वर्ण पदक विजेता काजल श्रेष्ठ वर्ल्ड तेक्वान्दो हान्मादाङ २०२५ मा उत्कृष्ट निर्णायक घोषित भएकी छन्।

अमेरिकाको क्यालिफोर्नियामा जुलाई १७ देखि १९ तारिखसम्म आयोजित उक्त अन्तर्राष्ट्रिय प्रतियोगितामा श्रेष्ठले ग्योरोगी (लडाइँ) तथा पुम्से (तालिम प्रदर्शन) दुवै विधामा निर्णायकको भूमिका सफलतापूर्वक निर्वाह गरेकी थिइन्। प्रतियोगितामा विश्वभरिका ३० राष्ट्रबाट करिब १ हजार ७ सय खेलाडी सहभागी थिए भने ८० जना निर्णायकको उपस्थितिमा प्रतिस्पर्धा सम्पन्न भएको थियो।

यसअघि पनि श्रेष्ठले अस्ट्रेलियन ओपन तथा जापानमा सन् २०२४ र २०२५ मा सम्पन्न वाटा ओपन तेक्वान्दो प्रतियोगितामा निर्णायकको रूपमा सक्रिय भूमिका निभाइसकेकी छन्। निरन्तर उत्कृष्ट प्रदर्शनका आधारमा उनलाई सन् २०२५ को वाटा ओपन मा पनि उत्कृष्ट निर्णायकको उपाधि प्रदान गरिएको थियो।