२४ अर्ब राजस्व संकलन गर्ने चीन नाका ठप्प, तत्काल खोल्न सरकारलाई सांसद सापकोटाको आग्रह

काठमाडौं । नेकपा माओवादी केन्द्रका सांसद माधव सापकोटाले उत्तरी नाका तत्काल सञ्चालनमा ल्याउन सरकारको ध्यानाकर्षण गराएका छन्। शुक्रबार प्रतिनिधि सभाको बैठकमा बोल्दै उनले चीनसँग जोडिने प्रमुख नाका तातोपानी र रसुवागढी बाढी–पहिरोका कारण लामो समयदेखि बन्द हुँदा मुलुकको राजस्व संकलन प्रभावित भएको बताए।

उनका अनुसार तातोपानी जाने अरनिको राजमार्ग २९ दिनदेखि अवरुद्ध छ भने रसुवागढी नाका समेत अवरुद्ध हुँदा वार्षिक २४ अर्ब रुपैयाँ राजस्व संकलन गर्ने लक्ष्यमा ठुलो धक्का लागेको छ। चाडबाड नजिकिँदै गर्दा नाका बन्द रहनु बजार भाउ आकासिने सम्भावना बढ्नेतर्फ संकेत गर्दै उनले सरकार सामान्य ढंगले काम गरिरहेको आरोप लगाए।

‘एउटा मेसिन मात्र लगाएर इको पहिरोमा काम भइरहेको छ, तर मुलुककै महत्त्वपूर्ण नाका लामो समयदेखि ठप्प छन्,’ सापकोटाले भने, ‘यो गम्भीर विषय हो, तत्काल साधन–स्रोत परिचालन गरेर पहिरो व्यवस्थापन गरी नाका सञ्चालनमा ल्याउनुपर्छ।’

त्यसैगरी उनले उखु किसानलाई दिँदै आएको अनुदान कटौती गर्नु निन्दनीय भएको भन्दै आपत्ति जनाए। दुग्ध किसान र उखु किसानका माग सम्बोधन गर्नुपर्ने आवश्यकता औंल्याउँदै सांसद सापकोटाले सरकारले कृषि क्षेत्रमा प्रत्यक्ष राहत र प्रोत्साहनका कार्यक्रम ल्याउनुपर्नेमा जोड दिए।