गृहमन्त्रीलाई विश्वप्रकाशको प्रश्न : जीबी राईलाई ल्याउन किन ढिलाइ ?

नेपाली कांग्रेसका सांसद विश्वप्रकाश शर्माले हजारौं नेपालीलाई ठगी गरेका जिबी राईलाई किन नेपाल ल्याउन सकिएन भनेर प्रश्न गरेका छन्।

प्रतिनिधि सभाको बुधबारको बैठकमा बोल्दै कांग्रेस महामन्त्री शर्माले हजारौं सहकारी बचतकर्तालाई ठगी गरेर भागेका राईलाई किन नेपाल ल्याउन नसकिएको हो भनेर प्रश्न गरेका हुन्।

सभामुखमार्फत् सांसद शर्माले प्रधानमन्त्री र गृहमन्त्रीलाई उक्त प्रश्न गरेका हुन्।

साथै उनले सहकारी पीडितलाई ५ लाखसम्मको रकम फिर्ता गर्ने प्रक्रिया तत्काल सुरू गर्न पनि प्रधानमन्त्री केपी शर्मा ओलीलाई आग्रह गरेका छन्।

‘सहकारी ठग कोही जेल गए, अझै पनि कयैंलाई कारबाही दायरामा ल्याउनलाई ढिलाइ किन भइरहेको छ?,’ शर्माले प्रश्न गरे, ‘जिबी राईका दुई पार्टनर (रवि लामिछाने र छविलाल जोशी) जेलमा छन् तर जिबी राईलाई मलेसियाबाट नेपाल ल्याउने परिणाममा पुगेको छैन?’

‘कूटनीति र प्रशासनिक शक्ति यति कमजोर छ? हजारौं नेपालीलाई ठगेको टिमको उपनाइकेलाई पक्रेर नेपाल ल्याउन सक्दैनौं?,’ उनले भने।